Բլինքենի տեղակալը Միրզոյանի և Բայրամովի հետ զրույցներում կոչ է արել անմիջապես բացել Լաչինի միջանցքն ու մյուս ճանապարհները

ԱՄՆ պետքարտուղարի եվրոպական և եվրասիական հարցերով տեղակալի պաշտոնակատար Յուրի Քիմն երեկ հեռախոսազրույցներ է ունեցել Հայաստանի և Ադրբեջանի արտգործնախարարներ Արարատ Միրզոյանի, Ջեյհուն Բայրամովի հետ։ Երկու երկրների արտգործնախարարների հետ ԱՄՆ պաշտոնյան քննարկել է տարածաշրջանային հարցեր։ Ըստ հայկական կողմի՝ Միրզոյանը Քիմին է ներկայացրել իրավիճակը տարածաշրջանում, իրավիճակը Լեռնային Ղարաբաղում։ Հայաստանի արտաքին քաղաքական գերատեսչության ղեկավարը վերահաստատել է 2020թ.նոյեմբերի 9-ի հայտարարության և Արդարադատության միջազգային դատարանի երկու որոշումների համաձայն Ադրբեջանի կողմից Լաչինի միջանցքի ապօրինի արգելափակման վերացման անհրաժեշտությունը։ Ընդգծվել է Կարմիր խաչի միջազգային կոմիտեի՝ ԼՂ անխափան մուտքի և մարդասիրական գործունեության ապահովման կարևորությունը։ Շեշտելով Ադրբեջանի կողմից այս ընթացքում իրականացվող ապակառուցողական վարքագիծը, իր իսկ կողմից ստանձնած պարտավորությունների և միջազգային հանրության հստակ կոչերի անարգանքը, ԼՂ-ում էթնիկ զտումներ իրականացնելու համակարգային քաղաքականությունը՝ Միրզոյանն ընդգծել է Ստեփանակերտի և Բաքվի միջև իրավունքների և անվտանգության երաշխիքների շուրջ քննարկումների համար միջազգային գործուն մեխանիզմի ներդրման անհրաժեշտությունը։ Ամերիկացի բարձրաստիճան դիվանագետը հեռախոսազրույցների մասին գրառումներ է կատարել X (նախկին Twitter) սոցիալական ցանցում: «Այսօր խոսեցի Հայաստանի արտգործնախարար Արարատ Միրզոյանի հետ Լեռնային Ղարաբաղում հումանիտար իրավիճակի շուրջ մեր լուրջ մտահոգությունների մասին: Մենք կոչ ենք անում բոլոր կողմերին այժմ աշխատել միասին՝ անմիջապես և միաժամանակ բացելու Լաչինի և մյուս ճանապարհները՝ Լեռնային Ղարաբաղ հասցնելու ծայրաստիճան անհրաժեշտ մարդասիրական մատակարարումները», – գրել է Քիմը: «Կառուցողական զրույց այսօր Ադրբեջանի [արտգործնախարար] Ջեյհուն Բայրամովի հետ՝ Լեռնային Ղարաբաղ մարդասիրական մատակարարումներ հասցնելու համար Լաչինի և մյուս ճանապարհներն անմիջապես ու միաժամանակ բացելու ուղղությամբ առաջընթացի վերաբերյալ: Ճանապարհների բացումը և ուղիղ բանակցություններն առանցքային են մնացյալ խնդիրները լուծելու համար: Ողջունում ենք երեք ուսանողների ազատ արձակումը», – ասված է Քիմի մյուս գրառման մեջ:

https://twitter.com/StateEUR/status/1699899027171545550?ref_src=twsrc%5Etfw%7Ctwcamp%5Etweetembed%7Ctwterm%5E1699899027171545550%7Ctwgr%5E1c39fbac4a3c9697a429119c71f0795874c6fcae%7Ctwcon%5Es1_&ref_url=https%3A%2F%2Fwww.azatutyun.am%2Fa%2F32583712.html

© dialoguemc.am  Freedom of speech & Pluralism