Կառավարությունը ավելի քան 2 մլրդ դրամ է հատկացրել Լոռու և Շիրակի մարզերում գործարկվող պարեկային ծառայությանը

Կառավարությունը ավելի քան 2 մլրդ դրամ է հատկացրել Լոռու և Շիրակի մարզերում գործարկվող պարեկային ծառայությանը Կառավարությունը 2 միլիարդ 35 միլիոն դրամ է հատկացրել ՀՀ ոստիկանությանը Լոռու և Շիրակի մարզերում պարեկային ծառայության ներդրման նպատակով ավտոտրանսպորտային միջոցների ձեռքբերման, դրանց կահավորման և վարչական սարքավորումների ձեռքբերման համար։ Կառավարության մարտի 17-ին հերթական նիստում նախագիծը ներկայացրել է Ոստիկանության պետ Վահե Ղազարյանը։ «Նախագծով նախատեսվող ծախսերի գծով ՀՀ ոստիկանության ընթացիկ տարվա բյուջեով միջոցներ հատկացված չեն, քանի որ բյուջետային քննարկումների ժամանակ առկա պահանջարկն ամբողջությամբ, քանակական և գումարային առումով, հստակեցված և գնահատված չէր։ Ըստ այդմ, նախագծով նախատեսվում է ծրագրով սահմանված հատկացումներն ավելացնել 2 միլիարդ 35 միլիոն դրամ։ Մասնավորապես, 289 միլիոն 900 հազար դրամ հատկացնել 2022 թվականին ապրիլին Լոռու և Շիրակի մարզերում գործարկվող նոր պարեկային ծառայության համար 140 տրանսպորտային միջոց ձեռք բերելու համար, 67 միլիոն 200 հազար դրամ այդ մեքենաների կահավորման համար, 1 միլիարդ 670 միլիոն 100 հազար դրամ վարչական սարքավորումներ ձեռք բերելու համար»,- նշել է Ղազարյանը։ ՀՀ վարչապետ Նիկոլ Փաշինյանը իր հերթին նշել է, որ ապրիլից Լոռու և Շիրակի մարզում գործարկվող նոր պարեկային ծառայությունը Կառավարության համար շատ կարևոր նշանակություն ունեցող բարեփոխում է։ Կառավարության մեկ այլ որոշմամբ էլ՝ է 10 մլն 69 հազար դրամ կհատկացվի 2021 թվականի դեկտեմբերի 1-ին ուժեղ քամու պատճառով վնասված «Արթիկի թիվ 1 հիմնական դպրոց»-ի մասնաշենքերից մեկի 620 քառակուսի մետր մակերեսով տանիքը նորոգելու համար։ Նախագծային աշխատանքների պայմանագրային գումարը կազմում է՝ 220 հազար, շինարարական աշխատանքներինը՝ 9մլն 600 հազար, հեղինակային հսկողության գումարը՝ 57 հազար, իսկ տեխնիկական հսկողության պայմանագրային գումարը կազմում է՝ 192 հազար դրամ։ Գործադիրի մյուս որոշմամբ Երվանդ Սերոբյանը նշանակվել է Շիրակի պետական համալսարանի ռեկտոր: Հարցը կառավարության այսօրվա նիստում ներկայացրել է ՀՀ ԿԳՄՍ նախարար Վահրամ Դումանյանը:

© dialoguemc.am  Freedom of speech & Pluralism