Հայրենական Մեծ պատերազմին մասնակից վետերան Գյումրին այլևս չունի. անցկացվել է ավագանու հերթական նիստը

Գյումրիի ավագանին գումարել  է հերթական նիստը՝ օրակարգում ունենալով  20 հարց:  Քննարկված հարցերը հիմնականում  վերաբերել  են կազմակերպություններին և անհատ քաղաքացիներին դրամական աջակցություն տրամադրելուն, ապօրինի կառուցված շինությունների օրինականացմանը և  հողատարածքների գործառնական նշանակությունները փոխելուն:

Գյումրիի քաղաքապետարանը ամեն  տարի  որոշակի ֆինանսական միջոցներ է տրամադրում այն կառույցներին,  որոնք  դիմում  են  այդ խնդրով: «Կարիտաս-Արեգակ» բարեգործական հիմնադրամը զբաղվում  է  աուտիզմ  ո ւնեցող  երեխաների  կրթմամբ և սննդի ապահովմամբ:  Քաղաքապետարանը 600.000 դրամ  հատկացրեց կառույցին, 400.000 դրամ  էլ  տրամադրվեց Գյումրիի գրողների միությանը՝ միջոցառումներ անցկացնելու նպատակով:

Քաղաքապետի խորհրդական  Լենա Ջիլավյանը ավագանու անդամների հարցերին ի պատասխան նշեց, որ տեղական բյուջեն շատ է պակասել, նաև պետբյուջեից տրամադրվող դոտացիան է նվազել, այդ իսկ պատճառով էլ  կառույցներին իրենց ուզածից քիչ ֆինանս են հատկացնում:

«Մեր հնարավորությունների սահմաններում ենք  գումար  տալիս, որ  տեսնեն, թե մենք անտարբեր չենք մեր քաղաքի իրադարձությունների նկատմամբ»,-ասում է Լենա Ջիլավյանը:

Ավագանու այս նիստով հաստատվեց նաև Արցախյան բոլոր պատերազմների ժամանակ զոհվածների ընտանիքներին,  դրամական  աջակցության տրամադրումը:

«Մենք մինչև անցած տարի գումար էինք  հատկացնում  նաև մեր  քաղաքում  ապրող  և տարբեր պատերազմների ժամանակ հաշմանդամ դարձած բնակիչներին, բայց մենք այդ մարդկանց ցուցակները կազմում  ենք  Գյումրիի զինկոմիսարիատի տված ցուցակների հիման վրա: Անցած տարվանից զինկոմը հրաժարվեց մեզ պատերազմներում վիրավորված անձանց ցուցակները տրամադրել, մտածելով, թե դա իր աշխատանքը չէ:  Մենք ավագանու անդամների հետ տարբեր ատյանների դիմեցինք այդ ցուցակները ստանալու, բայց  մերժում  ստացանք: Հիմա  այդ պատճառով  պատերազմների  ժամանակ  հաշմանդամություն  ստացած  անձինք  չեն կարող օգտվել  մեր  աջակցությունից»,-ասում  է  Լենա Ջիլավյանն ու ավելացնում,- «Այս տարի Գյումրիում  արդեն  չունենք  Հայրենական Մեծ պատերազմի վետերան, որ ֆինանսական աջակցություն տրամադրենք: Նրանք բոլորը մահացել են: Մայիսյան հաղթանակների շեմին, քաղաքապետարանը դրամական աջակցություն կտրամադրի Արցախյան բոլոր պատերազմներին զոհվածների, անհետ կորածների, գերեվարվածների  ընտանիքներին,  Աֆղանստանի պատերազմի և Հունգարիայի հեղաշրջման ճնշմանը մասնակցած գյումրեցիներն:

© dialoguemc.am  Freedom of speech & Pluralism