Հայրենիքն այլևս չպիտի անցնի նման փորձության միջով. ԱԺ նախագահը կոչ է արել մերժել բռնությունը որպես քաղաքական գործընթացների հանգուցալուծման գործիք

Ազգային ժողովի նախագահ Արարատ Միրզոյանը կոչ է անում բոլոր անհատներին, քաղաքացիական խմբերին, կուսակցություններին ի հիշատակ մարտի 1-ի զոհերի մի կողմ դնել քաղաքական տարաձայնությունները և մեկ ճակատով հանդես գալ` մերժելու բռնությունն ու սպառնալիքը որպես քաղաքական գործընթացների հանգուցալուծման գործիք։ Մարտի 1-ի իր ուղերձում Միրզոյանը մասնավորապես ընդգծել է՝ հայրենիքն այլևս չպիտի անցնի նման փորձության միջով։ «Գոռ Քլոյանը, Դավիթ Պետրոսյանը, Արմեն Ֆարմանյանը, Տիգրան Խաչատրյանը, Հովհաննես Հովհաննիսյանը, Գրիգոր Գևարգյանը, Սամվել Հարությունյանը, Զաքար Հովհաննիսյանը, ոստիկաններ Համլետ Թադևոսյանը և Տիգրան Աբգարյանը 13 տարի առաջ մարտի 1-ին երազում էին ապրել ազատ, ժողովրդավարական և երջանիկ Հայաստանում։ Մարտի 1-ին ապօրինի հրամանով կիրառված զինվորական ուժի արդյունքում 10 տարով կասեցվեց Հայաստանի Հանրապետության ժողովրդավարական ուղին։ Այս օրերին, երբ անթույլատրելիորեն մի քանի բարձրաստիճան զինվորականներ փորձ կատարեցին խառնվել ներքաղաքական գործընթացներին, մենք պարտավոր ենք թույլ չտալ իրադարձությունների նմանօրինակ զարգացումը», – հայտարարել է ԱԺ խոսնակը։

Աղբյուր՝ https://www.facebook.com/President.Parliament.AM/posts/3970192929685808

© dialoguemc.am  Freedom of speech & Pluralism