15 զինծառայողի կյանք խլած հրդեհի գործով քրեական հետապնդում է հարուցվել կապիտանի նկատմամբ

Կացարանում 15 զինծառայողի կյանք խլած հրդեհի գործով քրեական հետապնդում է հարուցվել Պաշտպանության նախարարության N զորամասի ինժեներական ծառայության սպա, կապիտան Ե.Հ.-ի նկատմամբ, հայտնում է գլխավոր դատախազությունը։ Ըստ դատախազության՝ սպան խախտել է շրջապատի համար առավել վտանգ ներկայացնող նյութի՝ ավտոբենզինի հետ վարվելու օրենսդրության պահանջը, համաձայն որի, արգելվում է վառարանները վառելու համար որպես կպչան, ավտոբենզինի և այլ տեսակի դյուրավառ հեղուկների օգտագործումը: Դատախազության, վկայակոչելով Քննչական կոմիտեի ձեռք բերած տվյալները, նշում է, որ Ե.Հ.-ն, սեփական նախաձեռնությամբ, կացարանի ավտոհավաքակայանից վերցրել է տրանսպորտային միջոցների մեկնարկիչները գործի գցելու համար հատկացված 5 լիտր տարողությամբ ավտոբենզինով լցված տասը հատ պլաստմասե տարաներից մեկը, վերադարձել է կացարան և վառարանը վառել ավտոբենզինով: Արդյունքում կացարանում բռնկվել է հրդեհ: Ըստ գերատեսչության՝ նախարարության մի շարք պատասխանատու պաշտոնատար անձանց կողմից իրենց ծառայողական պարտականությունների կատարման նկատմամբ անբարեխիղճ և անփույթ վերաբերմունքի հետևանքով՝ հակահրդեհային պաշտպանության համապատասխան միջոցներով չապահովելու պատճառով, զինծառայողները ոչ միայն չեն կարողացել մարել հրդեհը, այլև պահեստային ելքի բացակայության պայմաններում, կոտրել կացարանի պատուհաններին ամրացված երկաթյա ճաղավանդակները և դուրս գալ այնտեղից: Արդյունքում, ինչպես դատախազությունն է նշում, Ե.Հ.-ի կողմից կացարանում հրդեհ բռնկելու և պատասխանատու պաշտոնատար անձանց կողմից հակահրդեհային պաշտպանության միջոցներով անձնակազմին չապահովելու հետևանքով՝ կացարանում հանգստի մեջ գտնվող, նույն վաշտի թվով 15 պարտադիր ժամկետային զինծառայողներ մահացել են, իսկ սպան և 4 պարտադիր ժամկետային զինծառայողներ ստացել են տարբեր աստիճանի մարմնական վնասվածքներ։ Զինվորական կացարանում բռնկված հրդեհի գործով արդեն կալանավորվել են զորամասի հրամանատարի տեղակալն ու կոմունալ շահագործման ծառայության, հակահրդեհային պաշտպանության և փրկարար աշխատանքների ծառայության պետը։

Աղբյուր` https://www.prosecutor.am/am/mn/8916/

© dialoguemc.am  Freedom of speech & Pluralism