Եկամուտների աճից մինչև խոշոր շինարարություն․ Շիրակում ամփոփվել են արդյունքները

Շիրակի մարզխորհրդի 2026 թվականի անդրանիկ ընդլայնված նիստում ներկայացվել են 2025 թվականի ամփոփիչ և 2026-ի առաջին եռամսյակի արդյունքները։

 Համայնքների բյուջեների սեփական եկամուտները 2025-ին կատարվել են 102.1%-ով՝ կազմելով 5 մլրդ 632 մլն դրամ (գերակատարումը՝ ավելի քան 115 մլն դրամ)։ 2026-ի ապրիլի 1-ի դրությամբ ցուցանիշը 71.2% է։ Ամասիա, Արթիկ և Անի համայնքները գերազանցել են 100%-ը, իսկ Գյումրին, Ախուրյանը և Աշոցքը հետ են մնացել միջինից։

 Քաղաքաշինության ոլորտում 2025-ին իրականացվել են շուրջ 29.6 մլրդ դրամի ծրագրեր՝ 42%-ով ավելի, քան 2024-ին։ Կառուցվում և վերանորոգվում են տասնյակ դպրոցներ ու մանկապարտեզներ, բժշկական կենտրոններ, ինչպես նաև իրականացվել են ճանապարհաշինական ծրագրեր՝ շուրջ 39 կմ ընդհանուր երկարությամբ։ 2026-ի առաջին եռամսյակում աճի միտումը պահպանվել է։

 Սուբվենցիոն ծրագրերով 2025-ին իրականացվել է 36 ծրագիր՝ 4.28 մլրդ դրամ արժեքով, իսկ 2026-ին ընթացքի մեջ են տասնյակ նոր ծրագրեր՝ ավելի մեծ ֆինանսավորմամբ։ Մարզպետը ընդգծել է համայնք–կառավարություն համագործակցության արդյունավետությունը։

 Գյուղատնտեսության ոլորտում աճել են ցանքատարածությունները և բերքը, տրամադրվել է շուրջ 264 մլն դրամ փոխհատուցում կարկուտից տուժածներին, ինչպես նաև շարունակվում են պետական աջակցության ծրագրերը։

 Առողջապահության ոլորտում համընդհանուր ապահովագրության ներդրումը մեծացրել է ծառայությունների հասանելիությունը։ 2026-ի առաջին եռամսյակում սպասարկվել է ավելի քան 110 հազար դեպք, իսկ համակարգի շնորհիվ զգալիորեն նվազել են բժշկական հաստատությունների պարտքերը և բարձրացել են աշխատավարձերը։

 Մարզպետ Դավիթ Առուշանյանը նշել է, որ իրականացվող ծրագրերի ծավալները աննախադեպ են և ընդգծել է պատասխանատու աշխատանքի շարունակականության կարևորությունը։ Նա նաև կոչ է արել պետական կառույցներին առաջիկա ընտրությունների ընթացքում գործել բացառապես օրենքի շրջանակներում՝ ապահովելով ազատ և թափանցիկ գործընթաց։

© dialoguemc.am  Freedom of speech & Pluralism